– Русија експресно ги замени рестораните на Мекдоналдс, со домашна копија на брендот – Вујко Вања.
– Дали Русија ќе ги конфискува имотите на Мекдоналдс?
– Во Москва се отвора првиот ресторан Вујко Вања на местото на Мекдоналдс…
Ова се дел од вестите кои експресно се раширија низ западните медиуми, а кои лесно „залепија“ на логиката, се додека независни факт-чекери од Индија не решија подлабоко да ја истражат „веста“ со фотографии и видео од наводното отворање на локал на Вујко Вања во еден трговски центар во Москва на местото на Мекдоналдс. Тоа што фоторафиите и видеото беа повеќе од очигледно лажни, ги натера да ја доистражат „приказната“, со сите нејзини факти и полу-вистини.
Имено, сѐ почна кога Вјачеслав Володин, спикерот на долниот дом на Рускиот Парламент – Руската Дума запрашан за повлекувањето на Мекдоналдс по 30 години присуство во земјата на дури 847 локации, рече дека – „ако толку решиле да си одат, нека си одат, можеби на нивно место ќе изникнат некои нови руски ресторани, Вујко Вања на пример“.
По многу кусо време од изјавата, кажана метафорично и на шега, во Руската патент агенција е експресно регистриран брендот Вујко Вања, со речиси идентично но свртено лого на Мекдоналдс, кое од оригиналната буква М, е позиционирано како кирилично В.
Регистрацијата ја поднел извесен Александер Леонов, чија фирма не се занимава со угостителство туку со брендирање и интелектуална сопственост.
Но тоа било доволно за твитерџиите, експресно да направат „автентични“ фотомонтажи и видеа од подготовките за наводно отворање на Вујко Вања, а добар дел од западните медиуми и политичари, без проверка веднаш ја пренесоа „веста“.
