Филмот на македонската режисерка Теона Стругар Митевска „Најсреќниот човек на светот” е премиерно прикажан на филмскиот фестивал во Венеција, каде беше достапен на публиката 5 дена.
Филмот е навраќање кон војната во Босна, 28 години подоцна, низ човечката приказна и љубовна средба на слепо преку социјалните мрежи, на двајца четириесетгодишници, чија врска неминовно се претвора во приказна за тешките сеќавања на војната и потребата од простување.
– Удар со тупаница во стомакот
– Интензивно и луцидно трагично, каков што е и светот во кој живееме
– Трогателна и силна актерска игра
– Потресно сеќавање на ужасот и потребата да се надмине
– Горко чувство на вина и тажната моќ на простувањето. Поразително ….
Ова се само дел од првите реакции на публиката, напишани по гледањето на филмот, кој е во македонска, белгиска, словенечка, данска, хрватска и босанска копродукција.
Филмот е во конкуренција на паралелната програма на фестивалот – Хоризонти, во која се натпреварува во повеќе конкуренции.
Најголем успех во Венеција постигнал Милчо Манчевски со „Пред дождот“, кој освои Златен лав во 1994, додека со филмот „Прашина“ на Манчевски во 2001 беше отворен венецискиот фестивал.
